Thursday , August 24 2017

Strazburg: Makedonijakoro Rom kova so našavga po dzivdipe 2010, i Makedonija ka pukinel e familijake love!!!

O Govrementi tari Republika Makedonija ka pukinel ošteta ko iznos taro 9.000 evrija e familijake taro identifikujimo R.A., Rom kova so našavga po dzivdipe upral sumnitelna dikiba, ko 30 juli 2010 berš, pohari taro 48 arija sar so kuga te pašlol piri kazna ko pandlipe ki Gevgelija. O isplatibe tano kotor tari vonadalatsko spogodiba, kolaja čhivelape o agor e predmeteskoro “Eminov mujal Makedonija” kova vodinela pe sine ko Europakoro adalati bašo manušikane nijamija ko Strazburg, panda taro 2014 berš.

I eratutni objavimi vonadaltsko spogodiba sikavela dokaz bašo trendi e slično meribaskere slučhajevija e Romenge ki Makedonija, majobespravimo malcinstvo ki phuf, računinena agar taro Europakoro centro baši nijamija e Romengere (ECPR), tari Budinpešta Ungarija.

I familija e personeskiri kova so mulo, sar so na uspejnge te dobinen Pravda preka ko adalatsko sistemi ki Makedonija, ko 2014 berš arkaja taro ECPR mukla aplikacija anglo Europakoro adalati bašo manušikane nijamija.

“ o Slučhaj Eminov tano tužno dobimo , sebepi našajbe terno manušikano dzivdipe nane le matrijalno baripe thaj našti pherelpe o than oleskere dzivdipaskoro!, numa o fakti kaj ki Makedonija prifatisalilo baši spogodba, sikavela priznanije bašo kerdo bangaribe thaj phagipe anglo najvlijatelno adalatsko forumi ki Europa, o adalati ko Strazburg.ECPR tano zastapniko panda trine slučhajenge , kolende po dzivdipe našagele ko pandlipe o Roma, telo sumnibe bašo bilačhipe taro pandlipaskere službe ko nekobor pandlipa ki Makedonija: Skopje, Štip thaj Gevgelija. Akala slučhajevija nešto sikavena rumimo ko pandlipaskoro sistemi, so ikerelape dzi ko tretmani kerdo e Romenge. Amari cel tani asavke gruba bilačhe dukhajba e manušikane nijamenge te oven celosno iskornime!. Sa dzi asavki promena nae te ovel, amaro maribe anglo kherutne adalatija ka produzinel “ liparga bašo CIVIL media, Senada Sali, pravno zastapniko ko ECPR.

Prema ki obdukcija, o manuš so mulo ko phandlipe sine le vospalenie ko parne bukhe, adalea sinele bilačhipe sebepi o učho nivo taro metadoni thaj barbiturate so kerge panda po phareste leskoro dišibe, a adava anga o organija te čhinaven te keren buti. O nivo taro metadoni ko leskoro rat sine 7 putija poučho taro so valjanela te ovel.

“predoziribe metadoneja našti te ovel bi bahtalo slučhaj!. Osobeno na ko državakere ustanove, kontrolirime taro komandirija, čhuvarija, policajcija kola dikibaja na kerena pumari buti sar so valjanela prema ko kanunija” vakerela Senada Sali.

Ko havlaribe dzi ko publiciteti, o prezidenti taro ECPR, Gjorgje Jovanovič, hramonela kaj dzangavdo dikena akala palune trin sluchajevija, kolende so mule Roma ko phandlipe.

“zadovolna siem taro Govrementi e Makedonijakoro, kova so prifatinga te pukinel akaja ošteta, numa nane te mukalenge e Romengere slučhajevija so merena ko pandlipa, sar so si akava te butinenpe tela ko tepiko. Samo akava berš , panda trin pripadnikija  tari amari khedin mule ko Makedonijakere pandlipa thaj ko bi obična dikiba, koleste sine uklučimo medicinsko lečibe. Lengere familije zoraleste odbinena te prifatinen o objasniba bašo vlastija thaj rodena pravdina. Amen ka ikeralen thaj ka prava dali postojnela trend mudariba e Romen, sebepi bi dikiba ko Makedonijakere pandlipa” liparga o Jovanovič.

 

“ ko 11 mart 2017, Andrias Redzepov, 21 beršengoro Rom mulo ko pandlipe “Idrizovo”. Leskere familijake sine phendo kaj ov mulo tari kombinacija e metadoneja thaj dijazepam, numa na sine lenge muklo havlaribe tari obdukcija , I ako isi šajdipa kaj postojnena dokazija , so sine ikerdo ko policijakoro silibe ko periodi angla leskoro meribe”.

22mart 2017, Erdal Juseinov 25 beršengoro Rom, dad due tikne čhavengoro, mulo ko pandlipe ko Štip. Postojnena naodija ka ov sine maltretirimo taro pandlipaskere čhuvarija thaj doktorija, thaj deka na dobinela sine hajbe kobor so valjani, numa ov lela sine ilačhija kova so dena le sine e pandlipaskoro doktori ko vakti ko mulo.

Paluno slučhaj si ko 2 juni 2017 berš, keda 45 beršengiri Romani romni tari Strumica sine arakli muli ko pandlipe ko „Idrizovo“. I familija akala romnjakiri vakerena kaj lakoro meribe si rezultati tari tortura thaj maribe, koleste sine arakli taro pandlipaskere čhuvarija thaj o bilačho tretmani taro doktorija kerde upral olate. Pandlipakiri uprava negirinela sa akala naodija e familijakere, dejbaja argumenti kaj i romni sinela zorale personalna sastipaskere problemija“ hramonelape ko havlaribe taro ECPR.

ECPR podržinela e sotrinen Romane slučhajeven kola so mule akava berš ko pandlipe, te šaj aven dzi ko čačipe prekal o bange thaj dizutne postapke.

Chitingen li akava?

Agorkerga o 2to puti rekonstuiribe, uklena o avtobusija dzi ple palune stanice!!!

Agorkerga o rekonstruiribe e šaktenge, kova so ko sig vakti palo agorkeribe e atmosfersko kanalizacijake …

Angleder jek berš atakujmo o Imami, a akana i dzamija ko Berovo!!!

Erati pali jacija namazi, ko rakakere arija atakujmi sine i dzamija ko Berovo „Mehmet beg“, …