Kjani IbraimKopa Amerika: Argentina 3-to than , Brazil erat ko finale mujal Peru
Akava bersh o mechija tari Kopa Amerika khelgepe ko Brazil, kote so hari po hari alo dzi ko agor akava prvenstvo thaj o ramnibe o takatija ko fudbali mashkar o phuvja kova so lena kotor tari Juzno Amerika.
I Argentina sine la mechi basho 3-to than kova so khelgele mujal i nezgodno reprezentacija taro Chile thaj ola agorkerge rezultateja 2;1 bashi Argentina.
O rezultati pravgale o fudbaleri taro Manchester City, Sergio Kun Aguero kova so pogodinga i mrezha taro Chile ko 12-to dakiko angleder o izvedimo faul taro Messi , adaleja so i Argentina sine la prednos 1:0, numa palo odova basho 10 dakikija pobuter panda jek puti tinanga i mrezha e reprezentacijake taro Chile kova so pogodingala Paulo Dibala , a basho o gol asistiringa leske o fudbaleri taro Betis Giovani Lo Celso.
O avgo kotor taro mechi na bitinga shukar adaleja so sine sikavde duj lole kartonija sebepi o koshibe mashkar e Barcelonakiri ceren Lionel Messi thaj o fudbaleri taro Chile Garry Medel, pa sebepi adava o solduj reprezentacije sinelen po 10 igrachija ko tereni.
O agorusutno thaj konecno rezultati angale o Arturo Vidal kova so palo VAR sistemi sine sikavdo thaj dendo penal bashi leskiri selekcija thaj adaleja o mechi agorkerga 2:1 bashi i Argentina thaj oj lela o 3-to than ko akalebersheskoro Kopa Amerika.
Dzi kote kerelape lafi basho Brazil ola erat khelena mujal i reprezentacija taro Peru , ola resarenape ko finale thaj ka ovel len shajdipe i poshukar reprezentacija te rezel dzi ko zlato ki Kopa Amerika thaj te lel o avgo than ko akava turniri.
O mechi Brazil – Peru khelelape taro 22:00 o ari ko stadioni “Marakana” ki diz Rio de Janeiro, a ko adava mechi arbitro ka ovel taro Chile Tobar Vargas.
