O kladilnice tane sar hrami bašo čorole!

Kurko – nedela dive thojbaske šeja ki mašina (soske tegani i elektrika nane kuč), užariba, džajbe ko hramia, amalipa e majpašencar. ikljojbe te phirave tut prekal šajdipa negde ko lufti ko Skopje.. Kurko si dive kana nane than temake politika!..

Džaja aso hronologia. Uštava sabajle (bizo te ikavel man tari godi o alarmo te uštav baši buti) dikhav ko saato an o duvari klaj si 12 o časo. Uštava uravav ma majsig, thovava mo muj, o bala na thaj prastav ko buseskoro stasioni te astarav o buso ka počminen mange o fudbalsko mečia.
Resava an i kladilnica. em dikhav kaj nane manuša, em phenava so ulo akana? Vakerav mange kaj šaj si an o hramia anglal te aven an o čačutno “hrami” kote sa o “pakjavutne” taro sa o religie barabutne roden taro devel te asatren o tiketi lovencar.

Palo tikno vakti havav kaj aljum hari majrano soske o saati irandilo napalal jekh časo .
Ok lava mange kafa (ani kladilnica si nakuč) em startujnav hor analizaja kosem si hramosara liloro sar o Mijalkov dži ko Mickovski.
Palo tikno vaktio phergjol i kladilnica , aven manuša taro sa o percepcie majbut o čorole thaj okola so ačhile bizo love dži ko agor e masekoske.

Jekhto egzamplo: Adžikerndo te uplatinav tiketo anglal mande tergjol manuš fildžanea kafa an o vas em rodel te uplatinel “in live” a dikhel ko TV dali pelo desavo goli , em i kafa počmingja te mešinel penkaloa ko than rojaja. Khuvav le ko dumo vakeribaja kaj i kafa mešinel e penkaloa dikhlja ma em asando vakergja: ” Nane man godi buteder. Valjani mange love. Akava si jekhutni forma te avav dži olende” Bahtaja vakerav leske em irangjum man ko astali te dopijav mi kafa.

Dujto egzamplo: O manuš ko than te kucinel sar uplata taro 100 denaria ov kucingja 1.000 denaria . O manuš asandilo em vakergja 2Čhiv la 100 a na 1000 denaria nane mande odokhare love . O manuš koregiringja i suma lovencar a o terno vakergja: ” Tu ternea šukar si te khuve ki buti ko govermento , ola but droma keren feleri ko love em odola “0” so isi majbut a nane len niasvo džovaplipa bašo feleri.” Počmingja i sasti kladilnica te asal,.

Trinto egzamplo: Kana piljum mi kafa em i sportsko analiza uzal mande bešena sine aso olengiri diskusia jekh barvalo em jekh čorolo manuš, Keren sine debata ko ka marel ko “El Clasiko” em kobor love te čhiven (singl) kaj i Barsa ka marel e Reale. Ko vakti tari debata o barvalo lelja peske pijbaske taro 1.800 denaria Ko odova momenti o čorolo sikavel leske čeko kaj lela socialno 2.000 denaria saste masekoske te dživdinel pe familijaja. O barvalo diklhlja ole em vakerela: „ Ake nane te pijav akava jekh pijbe ake tuke 2.000 denaria dža khere te legare maro te familiake em e čhavenge”
Gelo peske o čorolo, a me da geljum mange.
Trubul salde manuš te džal an i kladilnica te šunel em te dikhel so nane e manušen, save problemia isi olen, sar dživdinena si len li love te ikaven o masek, em ka avel li savorenge majlačho dživdipa…?

Dehran Muratov – Civilmedia Lendo link: https://civilmedia.mk/kladilnitsata-e-hram-za-siromashnite/?fbclid=IwAR0Qu8joSKWpqAslt_1kTc64EaTQKQ2a0-oLx-hAuT824TyEKaitPJ4phHU


Bašo Amenge


Grupa taro terne Roma intelektualcija, novinarija, web dizajnerija, tehničarija, montažerija thaj javer personali savo so isilen baro iskustvo ki piri buti rodingje te keren nesto nevo ko mediumsko internet than ki Makedonija. Palo beshiba ko sostanok taro timi taro 24vakti.mk angjape decija kaj ko akava momenti falinela jek romano web tv portali savo ka nudinel pravilno, kvalitetno, informacija baši o Roma. Adaleske formiringape o www.24vakti.mk  ko adava sostanok čivgjem akala celija thaj pričine soske te formirina o jekutno romano web tv portali 24vakti.mk

24Vakti © Copyright 2015 – 2017, Sa o nijamija si protektirime