Kjani IbraimO Roma ko Novi Pazar dobingepeske khera
O shefi tari Delegacija tari Europakiri Unija ki Srbija, Sem Fabrici thaj i ministerka basho tamiribe, sobrakaj thaj infrastruktura ki Srbija, Zorana Mihajlovich erati uruchinge o kljucija e Romane dizutnenge taro neve khera ki Diz Novi Pazar ki mahala Blazhevo ki Srbija.
Akala khera si kotor taro proekti kova so finansirimo sine tari Europakiri Unija, Govrementi tari Srbija thaj o ministeriumi basho tamiribe, sobrakaj thaj infrastruktura ki Srbija thaj ov resarga pashe 600.000 evrija.
O predstavniko e Romengoro taro adava kotor ki Srbija tari diz Novi Pazar ki mahala Blazevo Mefajil Djukatani vakerga kaj akava si jek taro majbahtale dive akale familijenge thaj ko jek shukrakergape e donatorenge thaj bashi lokalno samouprava.
Dzi kote o dizjakorosherutno Nihat Bishevac vakerga kaj i diz Novi Pazar nane te chinavel o barabar butikeribe e Romane dizutnencar thaj ka dikhen te kheren so poshuze uslovija dzivdipaske basho olengere dizutne.
“Amari resarin si te kera poshuze uslovija dzivdipaske thaj poshukar integracija e Romenge ki amari lokalno zaednica , adaleja so ka kera buti thaj ponadari bashi adava” liparga o dizjakoroshertuno Nihat Bishevac.
O Ambasadori tari EU ki Srbija Sem Fabrici vakerga kaj i integracija e Romenge pashlola ko vilo basho sa olengere aktivnostenge thaj pobuter vakti kerena buti basho lengoro kherutnipe thaj educiribe.
” O Roma si majbaro minoriteti na samo ki Srbija nego vech thaj ki Europa , a ko jek agare si thaj o maj margilizirimi grupa . Integracija resarelape kherutnipaja , educiribaja, sastipaja thaj bukarnipaja” vakerga o Ambasadori tari EU ki Srbija Sem Fabrici.
Ov dopherga kaj o proekti basho kherutnipe ola ulozhinge 11,4 milionija evrija thaj kaj planirinena ko avutnipe te ulozhinen panda 20 milionija evrija.
I ministerka Zorana Mihajloich vakerga kaj lake si milo sar romni thaj daj kaj so ka oven kurtulirime o chavore thaj ka oven len ple khera ka dzivdinen akate.
” O chavore si adala kola so valjanena te sikaven kaj sarine amen siem jek dzijani , kaj nane razlike mashkar amende , kaj nane razlika dali sian Rom, Srbinco jali diso javer , valjanela te ikera rachuni ma te ovel diskriminacija thaj sar drzhava te kera uslovija te shaj sarine te educirinenpe thaj te ovel len buti” vakerga i ministerka basho tamiribe, sobrakaj thaj infrastruktura ki Srbija, Zorana Mihajlovich.
Akala Roma tari mahala Blazhevo dobingepeske montazhna khera , kote so ola si priklucime ko dizjakoro pani thaj kanalizacija , asfaltirimo lenge si o sherutno drom thaj panda javera 7 droma kova so ingarena len dzi ki ambulanta thaj i siklana ko Blazhevo.
