Emrah Aziri

Posledno čaša pani iftareske!

Kolumna

Kolaj te spremine tut ramazaneske sar svako normalno berš, akava Ramazani sine amengje ispit kote so but đene na sijam zadovolna amare rezultatencar. Samo so sikliljam taro akava karantini deka o Đamije tane amengje bitna morandiljam te izolirinamen olendar, dukhaja ko amare vile.

Na sine kolaj akava šužipa, ko asavko pharipa.

Ake avdive da i posledno čaša iftareske o kherutne denaman, dikhindor ola dova kerava bašo pošuže kherutne harmonije ko naredna berša, iako sijam zadovolna so dođakergjam akava da.

Ko but putija, ko lafi muhabeti amalencar hem dostencar sar te phene anketa kerava, pučava len sine :”Sigate nakhela neli ?”

Hem uvek hem uvek dobinava sine o ista đevabija so but sigate nakhlja.

Soske odobor sigate nakhlja ?

Soske svako dive sine amengje isto.

Angjam amengje rutina so ka ponovina la, dali pozitivno dali negativno motiveja.

Obično angleder o Ramazani ka đanel sine te umorinkerel amen taro različna aktivitetija. Akava Ramazani šaj na zojrakergja amare muskulija, ama phravgja amari godi, amari svest te mangamen poviše maškaro amende hem te sikava respekt.

Akava da Ramazani sine šanse te dikha sar nekoj mangela te odvinel amen umesto te pašakerel amen. Ama o phralipa akava puti angjam le ko pobaro nivo.

Sar uvek so postoingja i nepravda, akava da masek mangle te implementirinen la, da bi te šaj odole revolteja priznainaja so nane đi ki amari sila. Ama bistergje so o Allahi đ.š ko Kur’ani ki sura Ali Imran ko 54-to ajeti phengja :

 

وَمَكَرُوا وَمَكَرَ اللَّهُ ۖ وَاللَّهُ خَيْرُ الْمَاكِرِينَ

“Hem okola so na pakjana ko Allahi, lelje te keren spletke, ama O Allahi rumingja olengjere spletke, soske Ov odova Đanela Najšukar.”

 

Bistergje so amen kola so peraja ki phuv jekhe Gospodareske, na čutinaja ki nepravda.

Naprotiv ko akava Ramazani, molinajamen te avel o čačipe a te našavgjol i nepravda, soske dosta đivdingjam olaja.

Ma te bistra so sikliljam hem o moralna vrednostija sar te štedina, sar te ova produktivna hem khere, na samo ko amare rabotna thana.

Pa ka dikha sar amare daja, phenja hem romnja sar trudingjepe po celo dive samo kozom te šunen amendar :”But šužo o hajbe avdive..”

Odova olengoro asajbe ko odola momentija našti te isplatinelpe akale svetoskere valutencar hem nagradencar.

Đanava so ka složinentumen mancar ko akava lafi, o Muezinija zasigurno sine o heroija akale Ramazaneske.

Nane kolaj 5 puti ko dive te vikine okolen so našti priminejalen, pa sebepi odova te phergjon te glasovna žice asvencar hem dukhaja dok vikineja olen.

But sikliljam akava Ramazani, but pherdiljam iskustvo hem sigate phurliljam.

Sikliljam so i sloboda amari tani but skupo, hem so našti sa so mangeja, ked tu mangeja te kere.

Ka našti akava Bajrami te đa te probina o baklave amare manglende. Ka našti te đa te kera dove amare nakhlengje ko kaburija. Ka našti te pije i sabalutni kafa te amalencar ki čaršija. But bukja ka našti, ka osetinamen prazna, ka osetimen čorole, ama ma bistren so o čorolipa ponekad anela o najšužo dersi, a akaja prazno čaša palo posledno iftari so dikhava la anela nada, so inshallah panda but Ramazanija ka dođakera len, ama ko pošuže uslovija, hem phravde đamijencar, bizo maske.

Ko akava Ramazani, sikliljam so mrzinaja o maske, valjani te sikava jek muj. Nekoj akava “maratoni” ramazaneskoro prastandilo posigate, nekoj otkažingjape, nekoj pobedingja.

Pa neka ovel amengje akaja pobeda amaro Bajrami !

Molinava e Allahe te Prifatinel tumare dove, namazija, postija, sadake, zikrija sa o vrste ibadetija so kergjen ko akava Masek Ramazani, hem ko mo anav,

 

Mubareko o Ramazansko Bajrami.

Kolumna – Emrah Aziri


Bašo Amenge


Grupa taro terne Roma intelektualcija, novinarija, web dizajnerija, tehničarija, montažerija thaj javer personali savo so isilen baro iskustvo ki piri buti rodingje te keren nesto nevo ko mediumsko internet than ki Makedonija. Palo beshiba ko sostanok taro timi taro 24vakti.mk angjape decija kaj ko akava momenti falinela jek romano web tv portali savo ka nudinel pravilno, kvalitetno, informacija baši o Roma. Adaleske formiringape o www.24vakti.mk  ko adava sostanok čivgjem akala celija thaj pričine soske te formirina o jekutno romano web tv portali 24vakti.mk

24Vakti © Copyright 2015 – 2019, Sa o nijamija si protektirime