Terni romani džuvli sukceseja kerela buti baši romane kulturakoro barvalipe
I Džemiliana Abdulova si terni romani džuvli taro Skopje, apsolventi ko Hakajalo fakulteti ko Skopje ko kotor žurnalistika. Trujal odova, oj si pendžardi sar prezidenti ko Romano kulturakoro thaj media centari BARIKANIPE taro Skopje kova 6 berša sukceseja kerela buti ko aktivipa phanle e romane kulturaja thaj mediumencar. Ola pendžaraja ola em sar terni romani akterka ko pobut teatarsko performansia.
Sar em kana startuingja tli kariera?
“Panda kana sijum sine tikni lava sine than ko čhavorikane festivalia, ko tv emisie ko MTV, ko koncertia taro moderno baleti em folklor. Pogeči lava sine than ko amatersko teatareskere performansia ko festivalia taro „Romano ilo“, numa em bašo Romaverzitas baši Romengoro sumnaleskoro dive
Panda tgani haliljum kaj mangava te kerav buti ki kultura em mediumia. Odoleske džava sine ko but seminarja em treningoja sar amare phuvjate em avrijal olatar kote so sikljovava sine but bukja. Pal odova džangljum kaj šaj te kerav but proektia em aktivipa phanle e romane kulturaja. Agjaar nekozom terne formiringjam i biradžakiri organizacia BARIKANIPE kote uljum prezidenti em eke šovto berš sar realizirinaja pobut proektia maškar kolende em maškardžijaneskere proektija”, vakergja amenge i Džemiliana.
Džiakana o RKMC BARIKANIPE ikalgja 11 lila ki romani čhib nakhavde ki makedonikani čhib, a akava berš ka ikalen panda 3 lila. Trujal odova ola persi berš kergje duj onlajn promocije, i avgo 40 berša tari avgo romani gramatika taro Šaib Jusuf, a i dujto 40 berš taro poeziakoro butikeribe taro romano poeti Ibraim Džemail.
“Amen persi sar kotor tari Inovativno programa tar ERIAC kergjam em 3 video paramisja kote me sijum sine žurnalisti. Odola sine „Jek dive e pendžarde romane džuvlencar: Bajsa Arifovska, Silvibend em Mirdita Saliu. Akala paramisja vakerena kaj amen o džuvlja džanaja em šaj te kera but kvalitetno buti em te ova pendžarde ko odova so keraja. Valjani avgo te ovel piko tari daj em dat, taro majpaše te manuša kola ka den tuke takati te de sa so šaj korkori tutar te educirine tut em pal odova te sikave to talenti.
O talenti pendžargjola keda te ovel. Man sine man piko, sar jek bavlal so phudela sine me dumeste, em agjaar leljum takati te šaj te sikavav sa so džanava em te kerav kvalitetno buti. Mi resarin si te barvaljol i romani kultura so pobut. Isi amen šukar hramaria, gajakoja, artistia, akteria… sarine ola kerena kvalitetno buti em odoleske lengere bukja valjani te oven sikavde.
Me sijum barikani soske sikljovava taro but pendžarde em sajdime kulturakere em mediumeskere džene kolendar isi čače so te sikljvel pe. Odoleske planirinava te ovav panda pošukar ki romani lingvistika em te sikavav kaj i romani čhib si odoja so garavela amaro identiteti.
Ko pučibe „So kerela akana i Džemiliana?“, vakergja amenge kaj akava nilaj agorkergje e avgo seminareja baši romano holokausti em akana hazrikerela pe eksponiribe taro tasvirja so kergje o džene so lele than ko seminari. Akava eksponiribe ka ovel sikavdo onlajn ko masek so avela.
Taro Ministeriumi baši kultura ko agor taro masek ikalena pe duj lila ki romani čhib-čhavengoro romani kaske i Džemiliana kergja o tasvirja em dizajni, thaj jek lil poezia tari terni romani gajakina.
“Akava si samo jek tikno kotor tar odova so me kerava e organizaciaja. Numa, me na ačhovava akate, lava than ko treningoja em onlajn iventia. Sigende sijum sine šerutni lafikerutni ko onlajn iventi taro American corner. Jek džuvli sakana valjani te kerel buti upri peste, te ovel zorali, te sikljol. Me odova kerava em pakjava kaj em aver terne romane čhaja ka keren odova, agorgjema i Dzemilijana Abdulova o intervju, doperibaja – Agjaar sijam pozorale!
O teksti si kerdo ko pervazija taro proekti ” Oj Shaj”: Veshtinencar ki ekonomsko biathinalipe” Kerdo tari rig ko Centari bashi socijalna inicijative ” Nadež”, teloikerdo tari germanska fondacija Weltgwbwtstag.
Текстот е изработен во рамки на проектот „Таа може: Со вештини до економска независност“ спроведен од страна на Центарот за социјални иницијативи Надеж, а поддржан од германската фондација Weltgebetstag.
Sali Memed
