Ромите не се задоволни од сегашните состојби

Три важни точки беа предмет на денешната прес конференција одржана од партијата Демократски сили на Ромите и тоа: минатогодишниот попис на население, општествено политичката и економска состојба на Ромите и претстојниот протест на опозицијата, каде што  ДСР е коалиционен партнер.

Во однос на минатогодишниот попис, ДСР изрази големо незадоволство од добиените резултати, затоа што на претходниот попис бројот на Роми во проценти изнесуваше 2,66 %, а на минатата година беа преброени помалку Роми или 2,34% од по пишаното население. Оваа бројка не одговара на податоците со кои располага граѓанскиот сектор и политичките партии чии што податоци кажуваат дека бројот на Роми е  многу поголем од таа што е дадена од пописот. Тоа значи дека во Македонија кај Ромите нема наталитет,  туку има само морталитет, истакна  претседателот на ДСР г-динот Шабан Салиу, со надеж дека откако ќе се смени власта ќе се спроведе нов и пореален попис на населението.

Понатаму стана збор за општествено политичката и економска состојба на Ромите. Државата ја зголеми минималната плата, а од друга страна пак ја зголеми потрошувачката кошница. Сето тоа придонесе голем број на население, а особено  Ромите, да се најдат во многу тешка состојба. До ова свој придонес даде и исклучително слабата партиципација на ромските политички партии во процесите на одлучување и делување. „Уште еднаш потсетуваме дека нашата партија значително придонесува со своето гласачко тело во сите 6 изборни единици и тоа со  3.000 до 5.000  гласа. ДСР поддржува една изборна единица затоа што сме убедени дека на тој начин ќе се добијат најмалку 2 пратеника од ромски политички партии со што би се зголемил и нивниот  легитимитет“, рече  Салиу.

Ние нашето незадоволство од досегашните политички и економски шокови ќе го искажеме и на протестот кој ќе се одржи во сабота и воедно даваме целосна поддршка на нашиот коалиционен партнер ВМРО ДПМНЕ, истакна господинот Салиу и воедно ги повика сите граѓани на Република Македонија, сите Роми и своите сопартијци, масовно да излезат во сабота пред владата и да го искажат своето незадоволство од целокупната економска и политичка состојба во земјава.