Ki komuna Tetovo pravgjape – Proektno jekhin bashi i Romani khedin

Ko komuna Tetovo si fundirimi kancelarija bashi Proektno jekhin bashi implementacija ko proektija ko Roma thaj javera marginalizirime sasoitnipaskere kupe ki komuna Tetovo kote so trujal bersheskiri programa akaja kancelarija ka implementirinel aktivitetija kori poshukar shartija ko Romat haj javera marginalizirime kupe.

“Promovirinaja jek proekti bashi saporti bashi Roma thaj javera diskriminirime i komuna Tetovo thaj I them kamlape te dikel i diskriminacija kori o Roma te shaj ovena jekajek javerencar te shaj te chaljaren lengere rodibe i kancalarija ka koordinirinel sa o bukja taro aktivitetija thaj politike, panlo tari bersheskiri programa sar thaj impelemntiriba I romani strategija ko nacionalno nivelo” lipargja o dizjakorosherutno tari komuna Tetovo Bilal Kasami.

Trujal akaja kancalarija o Konsili tari komuna Tetovo ka ovel plo kotor ki akaja realziacija taro aktivitetija vakerela o Kasami.

“Isi nekobor tikne nukte save so ka kerel buti o Konsili taro Tetovo.Te arakel o minimalnikane shartija bashi o Roma ko Tetovo bashi lengoro poshukar dzivdipe ko sa o mahale kaj so dzivdinena o Roma ki akaja komuna. Indetifikujme si nekobor kritikane nukte bashi o Roma ko kola mahale thaj save sa problemencar khuvenape. Me ka vakerav salde jek 29 noemvri trujal dizjakiri len savi so si majbilacho minsal sar dzivdinena o dizutne ko adava than. mangaja odova te iranale shurarkerindoj urbanizacija tari akaja mahala detalno urbanistikane planeja, tamiriba infrastruktura keriba proektija bashi odova thaj sar so vakerelape te kerelpe normanla shartija dzivdipaske ko adava than vakerela “Kasami.

Dzikote I rakovoditeli  ki akaja kancalarija si Shefkete Hamza savi so liparela.

“Amari resarin trujal I proektno edinica o dizutne Ro ma thaj javera sasotnipaskere dizutne te oven aktivna faktorija ko anglodzajba tari komuna Tetovo. Akaja programa tari proektno jekhin ka ovel ulavdi ko nekobor umala  thaj odova ki edukacija, sastipe, bukjarnipe kherutnipe thaj kultura. Ko kotor tari edukacijakiri umal akate ka oven chivde nekobor nukte tari inkluizja taro chave Roma. tutorstvo, mentoririba, studensko saporto stipendiriba Roma  studentija thaj javer” , vakerela I Shefkete Hamza rakovoditeli ki proektno jekhin ki komuna Tetovo.

Thaj dziperela kaj amen sar proektna jekhin ko kotor taro bukjarne ka kera zori te shaj chivaja ki buti e romen tari akaja komuna. Ki komuna Tetovo ko pobuter kotora isi romane mahale save so isilen kamjabi tari infrastrukturna proektija, kanalizaciono sepetka dromalo roshalipe asfaltiriba ko droma thaj javera kherutnipaskere dajatve. Akava so vakeraja bashi kherutnipe si chivdo ki bersheskiri programa ki proektno jekhin bashi Roma ki komuna Tetovo thaj si kerdo lake budzesko linija, vakerela I Hamza.

Idea tari akaja proektno jekhin si ki komuna Tetovo te ovel bajrardi ko sekotori.

 “Bashi akaja proektno jekhin isi sasti saporti tari komuna Tetovo thaj taro dizjakorosherutno Bilal Kasami jekajek angleder te pravelpe akaja kancelarija sine informirime o Roma thaj dzanena kaj akate shaj te aven te roden save bilo bukja tari amare aktivnostija kote so amen ka ikova lenke ko pashibe”, vakerela Hamza.

Asavki kancalarija bashi Roma thaj marginalizirime kupe ko regioni si jekutni aktivnost kote so si telo ikerdi tari komuna.

Ko budzeti si chivde sar proektno jekhin nekobor infrastruktirna astariba kaj so isi roma ko mahale thaj akana adzikeraja lakiri realizacija. Amari resarin si te oven rezultatija ko teren na salde te achon ki hartija sar struktura te kerelpe ko umala so vakergjum poupre numa te kera lende buti odoleske si chivde akava bersh ki programa bashi lakiri realizacija.Kerdi si I bersheskiri programa thaj bashi 2023 bashi Roma thaj marginilizirime dizutne isijamen saporti taro dizjakoro sheutno pakjaja  kaj ko konsili ka nakel akaja programa te shaj ovelala budzet thaj realziacija dopherela i Hamza

“Angleder te pravelpe I kancalarija bashi proektno jekhin sine informirime o romane ngo thaj javera save so mangena te den arka ki khedin te ana decizija bashi chinaviba o romane problemija ki komuna Tetovo . Akate shaj te vakerav kaj Sonce o ngo shaj delamen arka ko nekobor umala taro aktivnostija tari komuna . Kergem vashramoviba thaj memorandum e romalitkoja bashi finasiriba akaja kancelarija . Jekjek isijamen sar komuna hramomo memorandum e romalitikoja bashi infrastruktirna khedimale akcije ko romane mahale. Ko akava kurko ka dikamen ulavde romane organizacijencar save so mangena te den arka khedimale te chinava o romane problemija ki komuna Tetovo,” vakerela I rakovoditelka tari proektno jekutni bashi Roma thaj marginilizirime sasoitnipaskere kupe ki  komuna Tetovo Shefkete Hamza.

I kancalarija si kerdi thaj arakelape karshi I fundavni sikljovni Lirija ko Tetovo.

Related post