Romane kulturakere kaleidoskopeskere prizmatar
O Romano kulturakoro thaj media centari Barikanipe ko 25 septembro 2026 berš, ko Kulturakoro kher „Kočo Racin“ ko Skopje ikergja i kulturakiri čhipota „Romane kulturakere kaleidoskopeskere prizmatar“. Ki čhipota sine sikavde o aktivipa thaj o rezultatia taro proekti „RomaVision – Kultura ki akcia“. Anglal o misafiria sine sikavde 11 autorune videoja kerde taro terne participantia […]
O Romano kulturakoro thaj media centari Barikanipe ko 25 septembro 2026 berš, ko Kulturakoro kher „Kočo Racin“ ko Skopje ikergja i kulturakiri čhipota „Romane kulturakere kaleidoskopeskere prizmatar“. Ki čhipota sine sikavde o aktivipa thaj o rezultatia taro proekti „RomaVision – Kultura ki akcia“. Anglal o misafiria sine sikavde 11 autorune videoja kerde taro terne participantia taro ternengoro kreativnikano kampi – saikerdo taro terne participantia kola lle than ko proekti. Pherdo temencar thaj kreativnikane sikavinencar, ola sikavde pire ideje, stavia thaj dikhina kori romani kultura.
Centralnikano kotor tari čhipota sine i panel-debata “Neve avazia, nevi kulturnikani vizia” nišankerdi ko terne Romengoro thanleibe ki kultura thaj arti, o šajdipa bašo lengoro profesionalnikano zuraribe thaj e instituciengiri thaj e organizaciengiri rolja ko suporti e terne romane autorenge. Ki diskusia lele than o Ajdogan Demiri, konsilutno ki kancelaria taro Radžakoro prezidenti; m-r Mirdita Saliu thaj m-r Sevdija Demirova Abdulova, trenerutne ko ternikano kampi, sar thaj I Adalet Mustafa Kjazimova thaj Mirela Salimovska, participantune ko kampi thaj videongere autorune. I debata sine moderirime taro Muarem Šakirovski-Gandi. O ternikano kreativnikano kampi thaj i publik čhipota sine realizirime ko pervazia taro proekti “RomaVision-Kultura ki akcia”, aktivime suportime ko pervazia taro proekti “Kultura bašo zuraribe” tari Švajcariakiri Radži, kova si implementirime taro Hartefakt fondi.
