O kandidati  bašo dizjakoro šerutno ki komuna Šuto Orozari thaj prezidenti ko Romengere demokratikane takatija (RDT), d-r Šaban Saliu thaj o legarutno ki patrin e kandidatenge baši konsilideibaskere manuša, Fert Asan, erati sine len arakhibe e dizutnencar tari Tikveška, Klisurska, Drinska, Brsjačka, Zletovska, Nov Život thaj Demirhisarska.

Ko tereni sine jakh dikhlo o hali, baro gunoj thaj naasfaltirime thaj čikale droma, so kerena pharipe ko dizutnengoro sakodiveskoro dživdipe.

Ko lafikeribe e dizutnencar, o timi taro RDT prezentiringje e programakere prioritetija resarinasa te kerel pe niče ko menadžiribe e gunoesa, sigutno cidibe e diva deponienge thaj šurarkeribe te asfaltirinen pe prioritetnikane droma jakhdikhle rokoncar.

„Šuto Orizari nane le vakt baši čuče lafija. Zaruri si sigutne, esapikerde thaj jakhdikhle admija save so ka anen uže droma, asfalti thaj funkcionalnikane servisija. Amende si sa jakhdikhlo, a adava si transparentnikane rokoja, publik evaluacija thaj partneribe e dizutnencar ki sakova avutno admi,“ vakergja o d-r Šaban Saliu. Ov džiphergja kaj i resarin si  te ovel funkcionalnikani thaj uži komuna evidentencar thaj uče esapideibaja anglal o dizutne, a adalea o dizutne ka oven direktnikane partnerija ko anglunipaskoro moljakeribe.