Šaban Saliu: Našti te šuna o jekhajekh lafija, ko Šuto Orizari zaruri si te kerel pe transformiriba!
O kandidati bašo dizjakoro šerutno ko Šuto Orizari, d-r Šaban Saliu, ko anglal alusaribaskoro video akharela te keren pe transformiriba thaj te iranel pe o lokalnikano radžalipe ko Šuto Orizari ko realnikane evidentija.
„Ohto berša šunaja jekhajekh lafija: bare lafija, tikne bukja“, vakergja o Saliu.
Kerindoj lafi bašo adava so ačola katar aktuelnikano šerutnipe, ov vakjerela kaj „avdive o Kurto Duduš na džanela tari savi partija si. Jekh drom SDSM, aver drom LDP, DOM, DUI thaj panda so na“.
Ko video mesaži o Saliu vakjerela kaj ko Šuto Orizari zaruri si te oven transformiriba, baši pošukar infrastruktura thaj urbanikano bajroibe.
„Te ovel pošukar edukacija, kultura thaj identiteti. Te ovel pošukar sastipaskiro thaj socijalnikano arakhibe. Te ovel pošukar lokalnikani ekonomija thaj neve bukjarne thana. Bašo čarjalo thaj transparentnikano Šuto Orizari“, džipherela o Saliu
O Saliu vakjerela kaj leskiri kampanja si kerdi upral resarina save so šaj te merinen pe thaj isi len institucionalnikano džovapjalipe .
„Amen adava so ka da le si – buti so ka šaj te dikhel pe thaj evaluacija savi so šaj te hošinel pe. I komuna zaruri si te ovel dizutnengoro servisi, a na privatnikani scena taro poedincija, vakerela o Saliu.
O video agorkerela akaribaja e dizutnen baši mobilizacija ko dive taro alusariba, thaj dela apeli:“ Ko 19 oktomvri rotakeren o gendo 24! NA DAJA LAFI, AMEN KERAJA“!
