Romane partije thaj o Alusariba ko Kosovo ko 14 Februari

Mashkar o 28 politikune subjektja ani sah Kosova 11 minoritarune politikune subjektja ani gara vash o anglo vahtune Alosaripja.

Adive shrdela e alosaripeski kampanja ani Kosova vash o avrirendune parlamentarune alosaripja kola adikegryona pe 14 februari, koja ka lungyargyol vasha 10 dive dji pe 12 februari.

Adivestar shrdena o oficialune aktivitetja kote o politikune subjektja, kote ani gara vash o deputetja ano Kosovako Sombeshipe si 28 politikune subjektja, 21 olendar politikune partie, 2 koalicie, thaj 5 dizunenge iniciative. Na si nijekh biumlavno kandidati thaj o sahastarno gendo e kandidatjengo ano akala alosaripja si 1079 kandidatja vash 120 deputetjenge thana ano Kosovako Sombeshipe.

11 kotar o totaluno gendo e politikune subjektjengo si kotar o haricune komunitetja( turkja, boshnjakja, gorajna, roma, ashkalie thaj egipqajna), mashkar lende duj romane politikune partie thaj duj dizunenge iniciative. Sakova dive o politikune subjektja ka puteren anglo dizune o politikune programja ani alosaripeski kampanja. Ano akala alsoaripja ani Kosova e romen reprezentinena 2 politikune subjektja, 2 dizunenge iniciative. Vash o Euromapress o zurnalisti kotar e Kosova lela nesave prononsipja e liderjengo e politikune subjektengo kola mothavena vash o aktivitetja sar ka adikeren, plan programja, gendo ani alosaripeski lista thaj adjukeripja kotar akala alosaripja.

Kana vakergjola vash o politikune subjektja e Romani partia PREBK(Kosovaki Jekhuni Romani Partia), ani akaja gara khuvela e pakjavipea vash o laqharipe e djivdipeske kondiciengo. Albert Kinolli, lideri e partiako PREBK mothavela o gendo 117, o gendo e partiako PREBK ani alsoaripeski lista thaj vekrla but zorale kaj ano akala alosaripja si te nikjol trimfuno odoleske kaj olengi partia sila programi vash o elviripe e romane komunitetesko socio ekonomikune statusesko thaj dena lafi kaj akaja partia ka ovel sarsakana pashe e Romenge.

foto 1 Albert Kinolli PREBK

Numaj ani javer rig e Kosovaki Nevi Romani Partia KNRP, ano akala alosaripja khuvela nesave javeripyencar. Ano sherunipe e listako si but bershuno pendjardo aktivisti thaj zurnalisti Orhan Galush.

Ov vakerla amenge vash o plani kova manglape sakoja partia te ovelola vash o vazdipe e edukaciako ko romane siklovne thaj studentja sar kaj o mashkarthemutne institucie manglape te len ano dikhipe e romengo pharo djivdipesko statusi ani Kosova.

Odoleske vakerla kaj ov sit e ovel phurt mashkar o roma thaj o maskarthemutne institucie kaj prekal e pozitiv presia pe Kosovako Guvernipe te reslol o manglo rezulatati ko Romane dizune ani Kosova. Ko agor mothavla o gendo e partiako KNRP ani alsoaripeski lista si 126.

E dizunengi iniciativa Kosovaki Romengi Anglipeski Phiravlin vay harne LPRK ano Prizren. Ani alosaripeski lista sila o gendo 123 sar LPRK.

O sheruno akala listako Erxhan Galushi, mothavla o moto e kampanjako kaj o Roma te gendinen kasa phirena vash olengo avutnipe. Sahipea kaj o terne manglape te phiraven nesave revulucionarne badjakja vash javeripe odoleske o Erxhani vakerla kaj ov sito odova kolea shaj ovla javeripe thaj revulucia.

O Erxhani avla ini kotar o romano civiljuno amalipe odoleske vakerla kaj o djanla so si o mangipja e dizunoske.

E javer nevi dizunengi iniciativa si e Romani Inicijativa kotar e Graqanica.

O Gazmen Salijeviq kotar e laparni iniciativa motavgja sar ka adikeren o aktivitetja kola si planirime ani akaja kampanja sar kotar o online platform ajekha vi ano tereni odote kote pendjargjona maj pashe o dizune e liderjencar thaj odote kote shaj dikhen maj pashe o bilaqho statusi e romengo kana vakera vash o Romengo pharo ekonomikuno djivdipe, vakerla o Salijeviq.

Plan programi e leparna iniciativako si evidentuno kaj rodingjola javeripe ano reprezentipe e Romengo ano institucie thaj akava resipe sit e ovel evidentuno ano akala alosaripja, o gendo e dizunenga iniciativako Romani Inicijativa sito 124.

Te lepargjol kaj o Kosovako Sombeshipe, prekal e Kosovaki Konstitucia sile rezervirime 20 thana vash o minoritetja 10 vash o serbjuno komuniteti, vaj 10 thana si vash o javer na serbjune komunitetja.

Anoa kava drom ipe o Roma, ashkalie thaj egipqajna silen rezervirimeshtar thana, po jek than si vash sakova komuniteti numaj o shtarto than lela e dujto partia koja iklola kotar votencar kotar o alosaripja odole komunitetestar kote si maj buderi vote.

Te lepara kaj o shtarto than vastime ini o egipqanjuno komuniteti ini o ashkaliuno numaj o romano komuniteti nijekh ver nane vastimoj o shtarto than.

Te dikha sar ka nakhel akava alosaripesko procesi, shaj te vastingjol ini e Romendar akava shtarto than???

Daut Qulangji -Journalisti EUROMAPRESS – Kosovo

Related post