O kandidati baši dizjakoro šerutno bašo Šuto Orizari, d-r Šaban Saliu, ko poro video vakeribe bičalela mesažo dži ko dizutne tari akaja skopjeski komuna kaj ka čivel agor ko manušengoro peravibe  thaj palo leibe e dizutnengo pakjaibe bašo dizjako šerutno ka šurarkerel sistematikani akcija bašo gunoesko užarkeribe.

„Sakova zdivi ko Šuto Orizari avdive anela manušengoro peravibe . E gunoeskiri khand peravela sakova drom, gušinela amenge e čhaven. Dosta si“, vakergja o Saliu.

Ko mesažo o Saliu vakerela konkretnikane napija panda taro avgo dive taro leskoro mandati sar dizjakoro šerutno.

„O avgo dive sar dizjakoro šerutno ka anav jek decizija: Šuto Orizari ka ovel la uži hava. Ka šurarkera avrijal ničale akcijaja bašo užarkeribe – nane niso te mukel pal pale“, vakerela o Saliu.

Džipherela kaj prioriteti ka ovel lungovakteski decizija bašo gunoj.

„Ka ana investicia baši fabrika gunoeske savi so ka kerel energija. Ka reciklirina o gunoj, a i komuna ka ovel energetikani saikerdi. Ka kera neve bukjarne thana bašo amare manuša ko Šuto Orizari“, vakjerela o prezidenti  ko Romengere demokratikane takatija(RDT) thaj  kandidati baši dizjakoro šerutno bašo Šuto Orizari, d-r Šaban Saliu.

O Šaban Saliu vakjergja thaj i moralnikani dajatva ko majterne thaj akarela ki dizutnengi mobilizacija thaj den tumaro hango bašo gendo 24.

„Akava si lafi anglal tumende, anglal o džijani: amare čhavenge si zaruri užu hava, na ladž. Phraljalen  thaj phenjalen Romalen, akava si amaro dakiko bašo iraniba. O Šuto Orizari ka dišinel. Thaj adava ka dikhel pe“, vakergja o Saliu.