Апасиев го одби Мицкоски: „Не верувај им на дпмнејците“
Лидерот на Левица, Димитар Апасиев, ја отфрли понудата на претседателот на ВМРО-ДПМНЕ за создавање на македонско национално единство и изјавата дека ќе има мораториум на нападите врз неговата партија и ЗНАМ.
За време на синоќешниот митинг во Охрид Мицкоски изјави:
„Мојата прва иницијатива за обезбедување на македонско национално единство ќе ја започнам со тоа што сакам да обзнанам мораториум во нападите кон партиите Левица и ЗНАМ. Ова го чувствувам како потреба на македонскиот народ но, и како моја обврска да се обидам да ја реализирам идејата за национално единство во моменти кога таа ѝ е најпотребна на Македонија“, рече Мицкоски.
Тој додаде дека со Левица и ЗНАМ, ВМРО-ДПМНЕ има свои разлики по повеќе прашања и од идеолошка но и од принципиелна природа, но смета дека во моментов, најважно за Македонија е да се фокусираат на оние кои што, според него, ја киднапирале државата од граѓаните.
